buanoc'h

Brezhoneg

Etimologiezh

Savet diwar an adverb buan hag an dibenn-ger -oc'h

Furm adverb

buanoc'h /byˈãːnɔx/

1. Derez-uheloc'h an adverb buan
   • Ar manac'h, a selle alies war e lerc'h, o gwelas ivez o tont d'an daoulamm, hag e taolas e vamm d'an traoñ, evit mont buanoc'h. — (Fañch an Uhel, Kontadennoù ar Bobl/3, Al Liamm, 1988, p. 216.)
   • Ne reaz nemed astenn he gammed evit mont buannoc'h er meaz a vourk Plougasnou. — (Lan Inizan, Emgann Kergidu Lodenn 2, J.B. hag A. Lefournier, Brest, 1878, p. 322.)
   • Buan e oa Morvarc'h, buanoc'h e oa an heizez. — (Yann ar Floc'h, Koñchennou eus Bro ar Stêr Aon, Levrdi Le Dault, Kemper, 1950, p. 40.)
   • An hini kozh a yeas buanoc'h. — (Jakez Riou, Geotenn ar Werc'hez ha danevelloù all, Al Liamm, 1957, p. 18.)
   • Gant reor ar picher e strabouilhas an dour er feunteun, evit ma redje buanoc'h er-maez ha ma yaje bilim an touseg d'e heul. — (Yeun ar Gow, E Skeud Tour Bras Sant Jermen, eil emb. Al Liamm, 1978, p. 26.)
   • [...] n'eo ket gant ur seurt kerc'h e vez lakaet ar c'hezeg da redek buanoc'h d'ar foar. — (Abeozen, Pirc'hirin Kala-Goañv, Al Liamm, eil emb. 1986, p. 12.)
   • Dre « internet », e teue a-benn ivez da brenañ un tamm butun-drol bennak, ha bremañ gant an ADSL ec'h ae buanoc'h an traoù. — (Fañch Peru, Kañfarded Milin ar Wern, Skol Vreizh, 2008, p. 13.)
2. Buanoc'h eget
   • — Ma laka e fri er prenestr », eme unan eus ar Chouanted, « va zenn fuzuilh-me her lakaio d'hen tennañ gantañ, war e giz, buanoc'h eget n'en devezo c'hoant, [...]. — (Lan Inizan, Emgann Kergidu 1, Brest, 1877, eil emb. Al Liamm 1977, p. 92.)
   • [...], ha, buannoc'h eget n'her lavaran d'eoc'h, e oue laosket varn-han daou-ugent tenn fuzil enn eun taol !..... — (Lan Inizan, Emgann Kergidu Lodenn 2, J.B. hag A. Lefournier, Brest, 1878, p. 19.)
   • — [...]. Neuze ec'h aio d'e varchosi hag e pigno war e dremedar, a zo buanoc'h eget an avel, evit dont war hon lerc'h. — (Fañch an Uhel, Kontadennoù ar Bobl/1, Al Liamm, 1984, p. 144.)
   • Rak an holl stêriou a red dour enno, gwir eo, met buanoc'h en eil eget en eben, met lousoc'h pe sklêroc'h en houman eget en hounnez. — (Ivon Krog, Eur Zac'had Marvailhou, Buhez Breiz, Kemper, 1924, p. 89.)
   • Buanoc'h ec'h ê evel-se dre vor ar varc'hadourez eget dre zouar, ha dreist-holl e-pad an hanv. — (Fañch al Lae, Bilzig, Kemper, 1925, p. 168.)
   • Ar c'hirri-dre-dan pa zegouezh dezho dont betek amañ a zo risklus dezho redek buanoc'h eget an dud ; [...]. — (Jakez Riou, An Ti Satanazet, Skridoù Breizh, 1944, p. 10.)
   • « Eo, avat ! Eur vaouez wenn o nijal buanoc'h eget an avel war-du n'ouzon dare pelec'h. » — (Yann ar Floc'h, Koñchennou eus Bro ar Stêr Aon, Levrdi Le Dault, Kemper, 1950, p. 225.)
3. Buanoc'h evit
   • — Aloñ ! Kerzh a-raok eta, ha buanoc'h 'vit evel-se ! — (Fañch an Uhel, Kontadennoù ar Bobl/3, Al Liamm, 1988, p. 62.)
   • Buhanoc'h eviti n'ec'h ê bet, met evelti ec'h errue d'e ampoent. — (Fañch al Lae, Bilzig, Kemper, 1925, p. 105.)
   • [...] ; ha petra bennak ma 'z ae buanoc'h evit kement labous a zo, [...] — (Troude ha Milin, Labous ar Wirionez ha Marvailhoù all, Skridoù Breizh, 1950, p. 140.)
   • Buannoh e varv ar foenn en e andell evid ma ra en e led. — (Jules Gros, Le trésor du breton parlé Deuxième Partie, 1970, p. 162.)
   • Diwar win e wellaër buannoh evid diwar jistr. — (Jules Gros, Le trésor du breton parlé Deuxième Partie, 1970, p. 203.)
4. Buanoc'h-buanañ : muioc'h-mui buan
   • [...]; no zistroe ket da zellet, ne rea nemed bale buannoc'h-buanna varzu he gear.... — (Lan Inizan, Emgann Kergidu Lodenn 2, J.B. hag A. Lefournier, Brest, 1878, p. 323.)

Gerioù enepster

• gorrekoc'h
• goustatoc'h

Troidigezhioù

• galleg : plus rapide(s) ^(fr) (que)
• galleg : plus rapidement ^(fr) (que)