divskoaz
Brezhoneg
Etimologiezh
- Savet diwar an anv-gwan pegementiñ div hag an anv-kadarn skoaz
- Da geñveriañ gant ar ger kernevveurek dywscoth
Furm anv-kadarn
divskoaz /ˈdi(w)skwa(s)/ daouder benel (furm vihanaat : divskoazig, liester : divskoazioù)
- (Korfadurezh) Daouder an anv-kadarn skoaz
- Ar C'houil a sav e vazh hag a sko tri pe pevar daol, a-dro-chouk, war benn ha war divskoaz an den gwenn, [...]. — (Lan Inizan, Emgann Kergidu 1, Brest, 1877, eil emb. Al Liamm 1977, p. 102.)
- P'am boue koulmet-mad va c'hordenn ha great enn-hi ur c'houlm-par, e lakiz va fuzil enn dro d'am diouskoaz, adren va c'hein. — (Lan Inizan, Emgann Kergidu Lodenn 2, J.B. hag A. Lefournier, Brest, 1878, p. 133.)
- [...] ; Job a oa ledan ha skoulmet-kaer, Lom a oa strizh e zargreiz ha strizh e zivskoaz ; [...]. — (Jakez Riou, An Ti Satanazet, Skridoù Breizh, 1944, p. 26.)
- Da gentañ, den nemetañ ne blede na gant e varv na gant e vlev a dape dezhañ betek e zivskoaz ; [...]. — (Jarl Priel, Va Zammig Buhez, Al Liamm, 1954, p. 20.)
- He fennad-blev kazugel a oa paket e div vailhadenn war he divskoaz, hag ul lien gwenn a gelc'hie he zal, evel ur gurunenn. — (Jakez Riou, Geotenn ar Werc'hez ha danevelloù all, Al Liamm, 1957, p. 66.)
- Goursevel ha diskenn a rae he divskoaz. — (Youenn Drezen, Sizhun ar Breur Arturo, Al Liamm, 1971, p. 63.)
- Lakaat a ris ma brec'h war he divskoaz. — (Pêr Denez, Glas evel daoulagad c'hlas na oant ket ma re, Al Liamm, 1979, p. 62.)
- [...], en em gavout a rae evel pan en dije gwisket war e zivskoaz ur vantellad enor nevez ha broudus. — (Edouarzh Ollivro, troet gant Jakez Konan, Pikoù Mab e Dad, Mouladurioù Hor Yezh, 1983, p. 307.)
- Hag eñ da sevel en e goazez ma kouezhas mantell bonner Hagrid diwar e zivskoaz. — (J.K. Rowling, lakaet e brezhoneg gant Mark Kerrain, Harry Potter ha Maen ar Furien, An Amzer embanner, 2012, p. 68.)
Doareoù-skrivañ all
- En doare-skrivañ etrerannyezhel e vez skrivet diwskoaz, diw skoaz