istor
 Gwelet ivez : Istor |
Brezhoneg
Gerdarzh
- Diwar an henc'halleg estoire, estoire ("kronikenn", "istor"), eus al latin historia, deuet eus an henc'hresianeg ἱστορίᾱ historíā ("deskiñ dre imbourc'hiñ"), e-unan diwar ἱστορέω historéō ("imbourc'hiñ, klask hag enrollañ"), e-unan diwar ἵστωρ hístōr ("neb a oar, a zo fur"), diwar ar c'hentindezeuropeg` *weyd- ("gwelout", "gouzout") hag al lostger *-tōr a verk oberour ur verb.
Anv-kadarn
istor /ˈistɔr/ gourel pe benel ; liester : istorioù
- Hollad an darvoudoù, an anadennoù hag o degouezhioù, a denn d'an dud, d'ur strollad tud, d'o obererezhioù, d'o oberennoù en tremened hag a triver da gounaat.
- Ne dan ket amañ da gontañ deoc'h istor an holl eskibien, ne gomzin deoc'h nemet eus a re hor bro. — (Lan Inizan, Emgann Kergidu 1, Brest, 1877, eil emb. Al Liamm 1977, p. 16.)
- Kalz traoù all, ouzhpenn ar re-mañ, am bije bet c'hoazh da gontañ diwar-benn bourc'h ha parrez Pleiben, dreist-holl diwar-benn o istor, ... — (Yeun ar Gow, E Skeud Tour Bras Sant Jermen, eil emb. Al Liamm, 1978, p. 59.)
- Istor an Hudouriezh e oa o arnodenn diwezhañ. — (J.K. Rowling, lakaet e brezhoneg gant Mark Kerrain, Harry Potter ha Maen ar Furien, An Amzer embanner, 2012, p. 271.)
- Desket oa zoken war an ilizoù hag ar c'halvarioù ha gouiziek-kenañ war istor ha buhez ar Sent. — (Goulc'han Kervella, Brezel ar Rigadell, Al Liamm, 1994, p. 32.)
- ..hag e zougen d'an ostaleri e-lec'h ma voe graet dezhañ gant Jann ar C'horr un degemer a chomo brudet en istor ar barrez. — (Jakez Konan, Lannevern e kañv ha danevelloù all, Al Liamm, 1980, p. 67.)
- Ar c'helenner-istor, komz kraoñennek a ra, met se ne ra mann. — (Edouarzh Ollivro, troet gant Jakez Konan, Pikoù Mab e Dad, Mouladurioù Hor Yezh, 1983, p. 24.)
- Etretant, tapet en devoa ar c'hure pleg da c'houlenn diganin meur a dra diwar-benn an doare-skrivañ, an istor, an douaroniezh, ... — (Jarl Priel, Va Zammig Buhez, Al Liamm, 1954, p. 37.)
- (Ent-strizh) Heuliad an darvoudoù hag an anadennoù-se diouzh red an amzer.
- Danevell an darvoudoù-se.
- (Ent-krenn) Danvez studi a bled gant an darvoudoù hag an anadennoù-se evit o renabliñ hag o dielfennañ.
- (Ent-strizh) An danvez studi-se a bled gant tremened an denelezh abaoe m'eo anavezet ar skritur.
- Hollad an anadennoù a denn da emdroadur un dra bennak.
- Danevell eus darvoudoù pe oberioù a zo bet ijinet.
- Pehini eus an div istor-se eo an hini wir ? — (Lan Inizan, Emgann Kergidu 1, Brest, 1877, eil emb. Al Liamm 1977, p. 20.)
- Kustum e oa ivez da c'hortoz a-raok kregiñ gant e verenn ken na vije bet kontet dezhañ un istor eus an amzer gwechall, ... — (Roparz Hemon, Gaovan hag an Den Gwer, 1949 kentañ emb. Embannadurioù Douar ar Yaouankiz (Al Liamm), eil emb. Levrioù Skol al Louarn (An Here), 1988, p. 8.)
- Me a zo o vont da lavarout eun istor am eus lennet n'eus ket gwall-bell c'hoaz : istor Marc'h, roue Poulmarc'h. — (Yann ar Floc'h, Koñchennou eus Bro ar Stêr Aon, Levrdi Le Dault, Kemper, 1950, p. 39.)
- Un istor spontus a zo bet kontet deomp e Poull an Enez gant Marivon Gergoad er mintin-mañ. — (Abeozen, Pirc'hirin Kala-Goañv, Al Liamm, eil emb. 1986, p. 125.)
- Amañ e krog istor estlammus ar roue Arzhur ha marc'heion an Daol-Grenn, gant o c'harantezioù, o strivoù uhel, o c'herseennoù. — (Langleiz, Romant ar Roue Arzhur/levrenn I : Marzhin, Al Liamm, 1975, p. 16.)
- - O ! an istor kozh-se ! Pec'hed yaouankiz ! [...]. — (Vefa de Bellaing, Ar peskig ruz, Al Liamm niv. 178, Gwengolo-Here 1976, p. 316.)
- Kentañ ma tegouezhas gant Mona Parantoen, ur gemenerez yaouank a-ziwar-dro, klevet kontañ an istor-se, [...]. — (Anatol ar Braz, lakaet e brezhoneg gant Erwan ar Moal, Mojenn an Ankou, Mouladurioù Hor Yezh, 1986, p. 22.)
- Istor ur plac'h pemzek vloaz hag he deus kuitaet kêr hag he skolaj gris evit mont da dañva aer yac'haus ar maezioù. — (Yann Gerven, Brestiz o vreskenn, Al Liamm, 1986, p. 16.)
- Nemet aes skrivañ un istor kaer hag aes da zirouestlañ, peogwir eo ijinet gant ar skrivagner e-unan. — (Goulc'han Kervella, Brezel ar Rigadell, Al Liamm, 1994, p. 189.)
- Din-me ma-unan ec'h embannan alies, fouge ennon, ez eo echu ha peurechu gant an istor kozh-se. — (Mich Beyer, Seizh Devezh Warn-ugent, An Alarc'h Embannadurioù, 2006, p. 9.)
- Kendirvi gompez e oa an daou gañfard a vo kaoz diwar o fenn en istor-mañ. — (Fañch Peru, Kañfarded Milin ar Wern, Skol Vreizh, 2008, p. 9.)
- – Ma digarez, emezañ, met ken trist eo an istor [...]. — (J.K. Rowling, lakaet e brezhoneg gant Mark Kerrain, Harry Potter ha Maen ar Furien, An Amzer embanner, 2012, p. 62.)
- Adstummoù
- istoer, e gwenedeg.